अजित कडकडे

अजित कडकडे
आयुष्य
जन्म	११ जानेवारी
जन्म स्थान	भारत
व्यक्तिगत माहिती
नागरिकत्व	भारतिय
देश	भारत
भाषा	मराठी
संगीत साधना
गुरू	पं. गोविंदराव अग्नी गोविंदप्रसाद जयपूरवाला पं. जितेंद्र अभिषेकी
गायन प्रकार	हिंदुस्तानी शास्त्रीय संगीत नाट्यसंगीत अभंग
संगीत कारकीर्द
पेशा	गायकी

अजित कडकडे (जन्मदिनांक ११ जानेवारी - हयात) हे मराठी हिंदुस्तानी गायक, पार्श्वगायक आहेत. कडकडे कुटुंबीय मूळचे गोव्याजवळील डिचोली गावचे. इंटरपर्यंतचे त्यांचे शिक्षण गोव्यातच झाले. कडकडे घराण्यात किंवा आजोळीही गाण्याचा वारसा नव्हता. केवळ घरच्यांनी सांगितले म्हणून ते गोव्यातील माडीये गुरुजींकडे गाणे शिकायला जाऊ लागले. माडीये गुरुजींनी त्यांन गांधर्व महाविद्यालयाच्या गाण्याच्या पहिल्या परीक्षेला बसविले. परीक्षेच्याच दिवशी कडकडे आणि मित्रांची क्रिकेटची मॅच होती. गाण्याची परीक्षा आहे असे सांगून अजित कडकडे क्रिकेट खेळायला गेले. जो मुलगा गाण्याची परीक्षा सोडून क्रिकेट खेळायला जातो, तो कसला गवई होणार, अशा शब्दांत माडीये गुरुजींनी माझ्याबद्दल वडिलांना सांगितले, आणि शिकवणी बंद केली.

पुढे काही दिवसांनी गावात पं. जितेंद्र अभिषेकी यांची संगीत मैफल झाली. बुवांचे गाणे ऐकून आतून कुठेतरी आपण गाणे शिकले पाहिजे आणि तेही अभिषेकीबुवांकडेच असे अजित कडकडे यांना वाटू लागले. त्यासाठी वडिलांबरोबर मुंबईला अभिषेकींच्या घरी गेले, त्यांना गाऊन दाखविले आणि जितेंद्र अभिषेकींनी त्यांना ‘आधी संगीताचे प्राथमिक धडे कुणाकडून तरी शिका आणि मग परत या’ असे सांगून घरी पाठवले.

अजित कडकडे यांनी हिंदुस्तानी शास्त्रीय संगीताचे प्राथमिक धडे पं. गोविंदराव अग्नी व पं. गोविंदप्रसाद जयपूरवाला यांच्याकडे घेतले. नंतर पं. जितेंद्र अभिषेकी यांच्याकडे त्यांनी दहा वर्षे संगीताची तालीम घेतली.

नाटकांतील भूमिका

अजित कडकडे यांना अगदी पहिल्यांदा संत गोरा कुंभार या संगीत नाटकात गाणार्‍या पात्राची भूमिका मिळाली. नाटकाचे संगीत जितेंद्र अभिषेकी यांचे होते. इतर कलावंतंनी सांभाळून घेतल्यामुळे या नाटकाचा बरा प्रयोग झाला.
पुढे नाट्यदिग्दर्शक रघुवीर नेवरेकर यांच्यामुळे अजित कडकडे यांना ‘संगीत संशयकल्लोळ’मध्ये ‘अश्विनशेठ’ ही भूमिका साकारण्याची संधी मिळाली. या नाटकात त्यांची आठदहा गाणी होती. या नाटकाचे प्रयोग खूप छान झाले आणि कडकडे यांना संगीत रंगभूमीवरील गायक-अभिनेता म्हणून स्वतंत्र ओळख मिळाली.

भक्तिसंगीत

अजित कडकडे यांची खरी आवड बैठकीत बसून गाणे सादर करण्याची असल्याने काही वर्षांनंतर रंगभूमीवर गायक अभिनेता म्हणून त्यांनी नाटकांत काम करणे बंद केले. ‘अमृत मोहिनी’ हे त्यांनी केलेले शेवटचे संगीत नाटक. गाण्यांच्या कार्यक्रमात अजित कडकडे आधीच गाजलेली गणी सादर करीत. पुढे संगीतकार अशोक पत्की यांनी संगीतबद्ध केलेली ‘सजल नयन नीत धार बरसती’, ‘विठ्ठला मी खरा अपराधी’ ही गाणी जेव्हा कडकडे यांना गायला मिळाली आणि ती लोकप्रिय झाली, तेव्हापासून अजित कडकडे भक्तिगीते गाऊ लागले.

असे असले तरी अजित कडकडे यांचे स्वतंत्र अल्बम नव्हते. संगीतकार प्रभाकर पंडित यांच्यामुळे तो योग जुळून आला आणि कडकडे यांची ‘देवाचिये द्वारी’ ही विविध संतांचे अभंग असलेली ध्वनिफीत प्रकाशित झाली; ती अमाप लोकप्रिय झाली. त्यानंतर कडकडे यांनी गायलेल्या अक्कलकोटचे स्वामी समर्थ, शेगावचे गजानन महाराज, शिर्डीचे साईबाबा, श्री दत्तगुरू यांच्यावरील भक्तिगीतांच्या, मंत्रांच्या तसेच अन्य भक्तिगीतांच्या बर्‍याच ध्वनिफिती निघाल्या. गुलशनकुमार यांच्या ‘टी सिरीज’ने ‘दत्ताची पालखी’ ही मराठीतील पहिली ध्वनिफीत काढली. अनुराधा पौडवाल व अजित कडकडे ह्यांनी तिच्यात गाणी गायली होती. संगीत नंदू होनप यांचे होते. या ध्वनिफितीतील प्रवीण दवणे यांनी लिहिलेले ‘निघालो घेऊन दत्ताची पालखी’ हे गाणे अमाप लोकप्रिय झाले.

अजित कडकडे यांची भूमिका असलेली संगीत नाटके

• अमृतमोहिनी
• कधीतरी कोठेतरी
• कुलवधू
• महानंदा
• शारदा
• संत गोरा कुंभार
• संशयकल्लोळ
• सौभद्र

अजित कडकडे यांची नाट्यगीते आणि स्वतंत्रपणे गायलेली काही भक्तिगीते

• ईश चिंता निवारील सारी (नाट्यगीत, नाटक शारदा)
• कांता मजसि तूचि (नाट्यगीत, संगीत नाटक स्वयंवर)
• गुरुविण नाही दुजा आधार (चित्रपटगीत, चित्रपट गोष्ट धमाल नाम्याची)
• छत आकाशाचे आपुल्या (नाट्यगीत, नाटक कधीतरी कुठेतरी)
• तारूं लागले बंदरीं (संतवाणी)
• तुझ्या वरदाना जीव (नाट्यगीत, नाटक सोन्याचा कळस)
• निघालो घेऊन दत्ताची पालखी (भक्तिगीत, संगीतकार नंदू होनप)
• विठ्ठला मी खरा अपराधी (भक्तिगीत, संगीतकार अशोक पत्की)
• सजल नयन नीत धार बरसती (भक्तिगीत, संगीतकार अशोक पत्की)
• परम गहन ईशकाम (नाट्यगीत, नाटक एकच प्याला)
• पाहू द्या रे मज विठोबाचे (नाट्यगीत, नाटक गोरा कुंभार)
• प्रेमा तिच्या उपमा नोहे (नाट्यगीत, नाटक वधूपरीक्षा)
• मैफिलीचे गीत माझे (भावगीत)
• या झोपडीत माझ्या (कविता)
• वसुधातलरमणीयसुधाकर (नाट्यगीत, नाटक एकच प्याला)
• वृंदावनी वेणू (संतवाणी)
• सजल नयन नित धार (भावगीत)
• सुकांत चंद्रानना पातली (नाट्यगीत, नाटक स्शयकल्लोळ)