तानाजी मालुसरे

नरवीर.तानाजी मालुसरे
तानाजी मालुसरे यांचा अर्ध-पुतळा
टोपणनाव:	तान्हाजी
जन्म:	इ.स. १६२६ गोडवली, सातारा , महाराष्ट्र, भारत
मृत्यू:	४ फेब्रुवारी १६७० सिंहगड, पुणे, महाराष्ट्र, भारत
वडील:	काळोजी मालुसरे
आई:	पार्वती मालुसरे
पत्नी:	सावित्री मालुसरे

तानाजी काळोजी मालुसरे (१६२६, गोडवली, सातारा - ४ फेब्रुवारी १६७० सिंहगड किल्ला) हे शिवाजी महाराजांच्या सैन्यातील एक सुभेदार व शिवाजी महाराजांचे बालपणीचे सवंगडी होते. तानाजीने महाराष्ट्रात शिवाजी महाराजांच्या स्वराज्य स्थापनेपासूनच अनेक महत्त्वाच्या घडामोडीत सहभाग घेतला होता.. नरवीर तानाजी मालुसरे यांचे एक स्मारक रायगड मधील महाड तालुक्यामध्ये असणाऱ्या आंबेशिवथर गावामध्ये सर्व ग्रामस्थांच्या तसेच भारतीय लष्करामध्ये कार्यरत असणाऱ्या सैनिकांनी व गावातील शहरात असणाऱ्या नोकरदार वर्गाने पुढाकार घेऊन आपल्या वैयक्तिक निधीतून उभे करण्यात आले आहे. हे स्थान महाड पासून ३० किलोमीटर अंतरावर निसर्ग स्थानिद्यात आहे.

बालपण

सातारा जिल्ह्यातील गोडवली गावात त्यांचे बालपण गेले. लहान पणापासूनच डोंगरदऱ्यांची माहिती असलेला हा तरुण. वडिलांच्या मृत्यूनंतर ते उंबरठ म्हणजेच त्यांचा शेलारमामा यांच्या गावी गेले.

कामगिरी

अफजलखानाच्या स्वारीच्या वेळी महाराजांनी काही निवडक सरदारांना प्रत्येकी हजार मावळ्यांचे सैन्य दिले होते. तानाजींनी ह्या सैन्याच्या बरोबरीने खानाच्या फौजेवर तुटून पडून उत्तम कामगिरी बजावली होती.

नरवीर तानाजी मालुसरेंची एक अपरिचित लढाई

तानाजींचा मृतदेह किल्ल्यावरून ज्या मार्गाने कोकणात नेला त्या मार्गाला मढे घाट म्हणतात. स्वराज्यातील रायगडाच्या बाजूला, कोकण पट्ट्यात असणाऱ्या स्थानिक दंगलखोर जमातींचा बंदोबस्त करण्याची जबाबदारी महाराजांनी तानाजींवर सोपविली होती. त्यासाठीच या भागातील उमरठ या गावात येऊन ते राहिले होते. आपलेपणाने वागून ह्या भागातील लोकांना स्वराज्याच्या कार्यात त्यांनी सहभागी करून घेतले.

कोंढाण्याची लढाई

फेब्रुवारी १६७० मध्ये कोंढाणा (सिंहगड) किल्ल्यावर रात्रीच्या अंधारात इतिहासप्रसिद्ध सिंहगडाची लढाई झाली. मराठा साम्राज्याचे सुभेदार तानाजी मालुसरे आणि कोंढाण्याचे राजपूत किल्लेदार उदयभानसिंग राठोड यांच्यात हे घनघोर युद्ध रंगले. किल्ल्यावर चढाई करताना तानाजींनी घोरपडीच्या मदतीने गडाचा अत्यंत अवघड असा द्रोणगिरी कडा सर केला आणि रात्रीच्या वेळी मावळ्यांसह गडावर प्रवेश केला.

गडावर चढताना मुघल पहारेकऱ्यांना याची चाहूल लागल्याने मराठे आणि पहारेकऱ्यांमध्ये चकमक उडाली. या संघर्षात किल्लेदार उदयभान आणि तानाजी मालुसरे आमनेसामने येऊन द्वंद्वयुद्धात गुंतले. युद्धादरम्यान उदयभानने तानाजींची ढाल फोडली; मात्र खचून न जाता तानाजींनी हाताला शेला लपेटून ढालीसारखा वापर केला आणि लढा सुरूच ठेवला. उदयभानने तानाजींचे चिलखत तोडले आणि अत्यंत तीव्र लढाईनंतर हे दोन्ही वीर या युद्धात मारले गेले. यानंतर तानाजींचे बंधू सूर्याजी आणि इतर मराठा सैन्याने दुसऱ्या मार्गाने गडावर प्रवेश करत मुघल सैन्याचा पराभव केला आणि कोंढाणा किल्ला स्वराज्यात आणला.

तानाजीची स्मारके

• तानाजी मालुसरेच्या स्मृतिप्रीत्यर्थ कोंढाणा गडाचे नाव बदलून सिंहगड ठेवण्यात आले.
• पुणे शहरातील वाकडेवाडी या भागाचे नाव बदलून ते नरवीर तानाजी वाडी असे करण्यात आले.
• पुण्याजवळील सिहंगडावर नरवीर तानाजी मालुसरेचे स्मारक असून, त्याचा अर्धपुतळा त्या ठिकाणी आहे.
• रायगड जिल्ह्यातील उमरठ या गावीही त्यांचा पुतळा व स्मारक उभारण्यात आले आहे.
• कवलापूर (ता. मिरज जि. सांगली) या गावात नरवीर तानाजी मालुसरे यांचा पूर्णाकृती पुतळा आहे.

पुस्तक संदर्भ

• दुर्ग सिंहगड - आनंद पाळंदे
• गड आला पण सिंह गेला - ह.ना. आपटे
• नरवीर तानाजी मालुसरे (बालसाहित्य) - पंडित कृष्णकांत नाईक
• तानाजी (अमर चित्र कथा -६८२)
• मराठ्यांची धारातीर्थे - प्रवीण भोसले, नरसिंह पब्लिकेशन्स
• राजाशिवछत्रपती - ब.मो. पुरंदरे, पुरंदरे प्रकाशन
• सिंहगड - पुरंदरे प्रकाशन
• सिंहगड - प्र. के. घाणेकर
• सुभेदार नरवीर तानाजी मालुसरे - दत्ताजी नलावडे
• सिंहगड - आप्पा परब

पुरस्कार

तानाजीच्या नावे छत्रपती शिवाजी महाराज ज्ञानपीठ इंटरनेशनल संस्थेचा वीर तानाजी मालुसरे राष्ट्रीय पुरस्कार दिला जातो.

चित्रपट

• तान्हाजी : द अनसंग वाॅरिअर (हिंदी चित्रपट, सन २०२०, तानाजीच्या भूमिकेत अजय देवगण).
• 'सुभेदार' हा मराठी चित्रपट सुद्धा सुप्रसिद्ध झाला!
• यापूर्वी १९५२ साली राम गबाले यांनी दिग्दर्शित केलेला 'नरवीर तानाजी' हा मराठी चित्रपट निघाला होता. चित्रपटात दुर्गा खोटे आणि मास्टर विठ्ठल यांच्या भूमिका होत्या.