विष्णुदास भावे

विष्णुदास भावे
जन्म नाव	विष्णुदास अमृतराव भावे
जन्म	१८१९
मृत्यू	ऑगस्ट ९, १९०१
राष्ट्रीयत्व	भारतीय
कार्यक्षेत्र	नाटक
भाषा	मराठी
साहित्य प्रकार	नाटक

विष्णुदास अमृतराव भावे (१८१९ - ऑगस्ट ९, १९०१) हे मराठी नाटककार होते. ते मराठी नाट्यपरंपरेचे जनक मानले जातात.

जीवन

विष्णुदास भाव्यांचा जन्म सांगली संस्थानाचे राजे चिंतामणराव पटवर्धन यांच्या पदरी असणाऱ्या अमृतराव भावे व त्यांच्या पत्नी यांच्या पोटी झाला. विष्णुदास भावे हे अतिशय बुद्धिमान हस्तकला कारागीर होते. त्यांनी बारीकसारीक हालचाल करणाऱ्या लाकडाच्या असंख्य बाहुल्या बनवून ठेवल्या होत्या. रंगमंचावर सीता स्वयंवर नाटकाचा प्रयोग बाहु्ल्या वापरून करावयाचा त्यांचा इरादा होता. परंतु तत्पूर्वी, कर्नाटकातील भागवत मंडळी कीर्तनी 'खेळ' करीत त्याप्रमाणे खेळ रचण्याची चिंतामणराव पटवर्धनांनी भाव्यांना आज्ञा केली. १८४३ साली राजांच्या पाठबळावर भाव्यांनी सीता स्वयंवर हे मराठीतील पहिले नाटक रंगमंचावर आणले. सांगली संस्थानाच्या राजवाड्यातील 'दरबार हॉलात' नोव्हेंबर ५, १८४३ रोजी या नाटकाचा पहिला खेळ झाला.

विष्णुदास भाव्यांनी बनवलेल्या त्या बाहुल्या पुढे रामदास पाध्ये या कलावंताच्या हातात आल्या. त्यांनी व त्यांच्या पत्मी अपर्णा पाध्ये यांनी खूप दिवस खटपट करून भाव्यांच्या बाहुल्यांच्या रहस्याचा छडा लावला, आणि एके दिवशी, विष्णुदास भाव्याना रंगमंचावर करता न आलेला सीता स्वयंवराचा प्रयोग त्याच बाहुल्या वापरून केला.

कारकीर्द

नाटके

नाटक	वर्ष (इ.स.)	भाषा	सहभाग
सीता स्वयंवर	१८४३	मराठी	लेखन, गीतलेखन, दिग्दर्शन
राजा गोपीचंद	१८५४	हिंदी	लेखन, दिग्दर्शन

पुरस्कार

• विष्णुदास भावे यांच्या स्मृतिप्रीत्यर्थ सांगलीची अखिल भारतीय नाट्य विद्यामंदिर समिती ही इसवी सनाच्या १९६० सालापासून विष्णुदास भावे पुरस्कार देत आली आहे. सांगली येथील ही समिती व राज्य मराठी नाटय परिषद यांच्यातर्फे दरवर्षी ' रंगभूमी दिना ' दिवशी हे मानाचे पदक दिले जाते. या पुरस्काराचे स्वरूप, मराठी रंगभूमीचे आद्य नाटककार विष्णुदास भावे यांच्या नावाचे गौरव पदक, ११ हजार रुपये रोख व स्मृतिचिन्ह असे असते. मराठी रंगभूमीवर प्रदीर्घ सेवा करणाऱ्या ज्येष्ठ कलाकारास हे गौरव पदक देण्यात येऊन सन्मानित करण्यात येते. आत्तापर्यंत हा पुरस्कार बालगंधर्व, केशवराव दाते, मास्टर कृष्णराव, भालचंद्र पेंढारकर, नानासाहेब फाटक, मामा पेंडसे, दुर्गा खोटे, विश्राम बेडेकर, ग.दि.माडगूळकर, पु.श्री.काळे, प्रभाकर पणशीकर, वसंत कानेटकर, हिराबाई बडोदेकर, बापूराव माने, शरद तळवलकर, छोटा गंधर्व, ज्योस्ना भोळे, माधव मनोहर, दिलीप प्रभावळकर(२००७), रामदास कामत (२००८), शं.ना. नवरे (२००९), फैय्याज इमाम शेख (२०१०), रत्नाकर मतकरी (२०११), अमोल पालेकर(२०१२) आदींना मिळाला आहे.
• महाराष्ट्र राज्य हिंदी साहित्य अकादमी ही मुंबईतील संस्था वर्षातील उत्कृष्ट हिंदी नाट्यरचनेसाठी विष्णुदास भावे पुरस्कार देते. यापूर्वी हा पुरस्कार मिळालेले नाटककार : डॉ.सुनील केशव देवधर(पुणे) यांना ’मोहन से महात्मा’ या नाटकासाठी.

बाह्य दुवे

• मायमराठी.कॉम - विष्णुदास भाव्यांचा अल्पपरिचय
• मायसांगली.कॉम - विष्णुदास भावे