रोन-आल्प (फ्रेंच: Rhône-Alpes; ऑक्सितान: Ròse-Aups) हा फ्रान्सच्या आग्नेय भागातील एक भूतपूर्व प्रदेश आहे. रोन-आल्पच्या पूर्वेस इटली तर ईशान्येस स्वित्झर्लंड हे देश आहेत. युरोपातील सर्वात मोठ्या नद्यांपैकी एक असलेली रोन नदी तसेच आल्प्स पर्वतरांगा ह्यांवरून ह्या प्रदेशाचे नाव रोन-आल्प असे पडले आहे. ल्योन हे फ्रान्समधील दुसरे मोठे महानगर रोन-आल्प प्रांताची राजधानी आहे. ग्रेनोबल, सेंत-एत्येन व व्हालांस ही येथील इतर प्रमुख शहरे आहेत. फ्रान्स व स्वित्झर्लंडची सीमा अंशतः ठरवणारे जिनिव्हा सरोवर रोन-आल्पच्या ईशान्य भागात स्थित आहे. आर्थिक दृष्ट्या समृद्ध असलेला रोन-आल्पची अर्थव्यवस्था युरोपामधे सहाव्या क्रमांकावर आहे.
आल्प्स पर्वतराजीमध्ये स्वित्झर्लंडच्या जवळ वसलेले रोन-आल्प हे युरोपातील एक मोठे पर्यटन क्षेत्र आहे. ह्यामुळे रोन-आल्पमध्ये रेल्वे व महामार्गांचे जाळे आहे. टीजीव्ही ही फ्रेंच रेल्वे कंपनी येथे अनेक मार्ग चालवते.
फ्रान्स
