ॲव्हेंजर्स: एंडगेम
अॅव्हेंजर्स: एंडगेम हा २०१९ चा अमेरिकन सुपरहिरो चित्रपट मार्वल कॉमिक्स सुपरहिरो संघ अ‍ॅव्हेंजर्सवर आधारित आहे. मार्व्हल स्टुडिओ द्वारे निर्मित आणि वॉल्ट डिझ्नी स्टुडिओ मोशन पिक्चर्स द्वारे वितरीत केलेला हा चित्रपट अॅव्हेंजर्स: इन्फिनिटी वॉर (२०१८) चा पुढील भाग आणि मार्वल सिनेमॅटिक युनिव्हर्स (MCU) मधील २२ वा चित्रपट आहे. अँथनी आणि जो रुसो दिग्दर्शित आणि ख्रिस्तोफर मार्कस आणि स्टीफन मॅकफिली लिखित या चित्रपटात रॉबर्ट डाउनी ज्युनियर, ख्रिस इव्हान्स, मार्क रफालो, ख्रिस हेम्सवर्थ, स्कारलेट जोहानसन, जेरेमी रेनर, डॉन चेडल, पॉल रुड, कॅरेन गिलन, दानाई गुरिरा, बेनेडिक्ट वोंग, जॉन फॅवरू, ब्रॅडली कूपर, ग्वेनेथ पॅल्ट्रो आणि जोश ब्रोलिन यांचा समावेश आहे. चित्रपटात, अ‍ॅव्हेंजर्सचे हयात असलेले सदस्य आणि त्यांचे सहयोगी इन्फिनिटी वॉरमधील थानोसच्या कृतीला उलटवण्याचा प्रयत्न करतात.
चित्रपटाची घोषणा ऑक्टोबर २०१४ मध्ये अॅव्हेंजर्स: इन्फिनिटी वॉर – भाग २ म्हणून करण्यात आली होती, परंतु मार्वलने नंतर हे शीर्षक काढून टाकले. रुसो बंधू एप्रिल २०१५ मध्ये दिग्दर्शक म्हणून सामील झाले. मार्कस आणि मॅकफीली हे एका महिन्यानंतर पटकथा लिहिण्यासाठी आले. हा चित्रपट एमसीयूच्या कथेचा तोपर्यंतचा निष्कर्ष म्हणून काम करतो तसेच अनेक मुख्य पात्रांसाठी कथेचा शेवट करतो. कथानक पूर्वीच्या चित्रपटांच्या अनेक क्षणांची पुनरावृत्ती करते, संपूर्ण मालिकेतील कलाकार आणि घटना परत आणते. चित्रीकरण ऑगस्ट २०१७ मध्ये फिएट काउंटी, जॉर्जिया येथील पाइनवुड अटलांटा स्टुडिओमध्ये सुरू झाले. इन्फिनिटी वॉरसह समांतर चित्रीकरण करण्यात आले जे जानेवारी २०१८ पर्यंत चालले. मेट्रो आणि डाउनटाउन अटलांटा, न्यू यॉर्क राज्य, स्कॉटलंड आणि इंग्लंडमध्ये अतिरिक्त चित्रीकरण झाले. अधिकृत शीर्षक डिसेंबर २०१८ मध्ये उघड करण्यात आले. अंदाजे $३५६-४०० दशलक्ष खर्चात बनलेला हा चित्रपट आतापर्यंतच्या सर्वात महागड्या चित्रपटांपैकी एक आहे.
अॅव्हेंजर्स: एंडगेमचा प्रीमियर लॉस एंजेलिसमध्ये २२ एप्रिल २०१९ रोजी झाला आणि MCU च्या तिसऱ्या टप्प्याचा भाग म्हणून २६ एप्रिल रोजी युनायटेड स्टेट्समध्ये प्रदर्शित झाला. चित्रपटाचे दिग्दर्शन, अभिनय, म्युझिकल स्कोअर, अॅक्शन सीक्वेन्स, व्हिज्युअल इफेक्ट्स आणि भावनिक भार यासाठी प्रशंसा मिळाली. चित्रपटाने जगभरात $२.७९९ अब्ज कमावले, केवळ अकरा दिवसांत इन्फिनिटी वॉरच्या कमाईला मागे टाकले आणि अनेक तिकीट खिडकीवरचे विक्रम मोडले. जुलै २०१९ ते मार्च २०२१ पर्यंत आतापर्यंतचा सर्वाधिक कमाई करणारा हा चित्रपट बनला. चित्रपटाला ९२व्या अकादमी पुरस्कारांमध्ये सर्वोत्कृष्ट व्हिज्युअल इफेक्ट्ससाठी नामांकन मिळाले. तसेच इतर अनेक पुरस्कार मिळाले. अॅव्हेंजर्स: द कांग डायनेस्टी आणि अॅव्हेंजर्स: सिक्रेट वॉर्स नावाचे पाचवे आणि सहावे अॅव्हेंजर्स चित्रपट २०२६ आणि २०२७ मध्ये प्रदर्शित होणार आहेत.