सोलापूर मार्शल कायदा

विकिपीडिया, मुक्‍त ज्ञानकोशातून
Jump to navigation Jump to search

हिंदुस्थानच्या स्वातंत्र्य लढयातील सोलापूरचा सहभाग अभुतपूर्व आहे.सोलापूरातील घटनांनी साऱ्या जगाला दिपवून टाकले.त्यापैकी मार्शल कायदयाचा काळ एक धगधगते अग्नीकुंडच म्हणावे लागेल. सोलापूर शहराचे वर्णन भारतीय स्वातंत्र्याच्या इतिहासात शोलापूर असे केले आहे.शोलापूर म्हणजे शोलोंका हुतात्माओंका शहर .१२ जानेवारी १९३१ साली सोलापूर शहरातील चार तरुण देशभक्ताना श्री.मल्लप्पा धनशेट्टी, श्री.किसन सारडा, श्री.जगन्नाथ शिंदे,श्री. कुर्बान हुसेन यांना ब्रिटीशानि त्यांनी न केलेल्या गुन्हयाबद्दल केवल दहशत बसवण्यासाठी पुण्याच्या येरवडा तुरुंगात फासावर चढवले. आपल्या प्राणांची आहुती देऊन या चार हुतात्म्यांनी सोलापूर शहराचे नाव भारतीय स्वातंत्र्यलढ्याच्या इतिहासात अजरामर केले.

मार्शल कायद्याची पार्श्वभूमी[संपादन]

महात्मा गांधीनी एप्रिल १९३० ला सविनय कायदेभंगाची चळवळ सुरु केली.लवकरच या चळवळीचे लोण संपुर्ण भारतभर पसरले.सोलापूर शहर त्याला अपवाद नव्हते. ५ मे १९३० रोजी रात्री १०.३० वाजता गांधीजींच्या अटकेची बातमी सोलापूरात येऊन धडकली.या धक्कादायक बातमीने सारा समाज अस्वस्थ झाला. ६ मे १९३० ला सर्वत्र तणाव जाणवत होता. दुकाने,गिरण्या बंद होत्या.मिरवणूका,घोषणा,दारू दुकानाची नासधूस असे प्रकार सुरु झाले. महिलांनी वेगळी मिरवणूक काढली. जमावाच्या एका गटाने मद्रास मेल अडवून नंतर ती सोडून दिली.श्रद्धानंद समाजाने दिवसभर शिंदीची झाडे तोडून सत्याग्रह केला.सरकारने काही प्रमाणात लाठीहल्ला,गोळीबार केला.

दि.०७ मे १९३० हा दिवस उजाडला प्रक्षोभक वातावरणातच लक्ष्मी-विष्णू गिरणीजवळ पोलिसांना गोळीबार करावा लागला. दिवसभर मिरवणूक, पोलिसांची हुर्यो उडविणे, त्यांना गांधी टोपी घालावयास लावणे चालूच होते.सतत लाठीमार,गोळीबार करणाऱ्या सरकारबद्दल जनतेच्या मनात तिरस्काराची भावना निर्माण झाली. दिनांक ०८ मे उजाडला तो काळा दिवस म्हणूनच. सरकारने वीर नरीमन या युवक संघाच्या प्रमुखास अटक केली. युवक संघाने जंगी मिरवणूक काढली. शहरभर हिंडून ती टिळक चौकात आली. मिरवणुकीचे रुपांतर सभेत झाले. सरकारचा निषेध करण्यात आला. शांततेचे आव्हान करून सभा संपली.मिरवणूक बाळीवेशीत असताना तरुणांचा एक गट रुपाभवानी जवळची सिंधीची झाडे तोडण्याचा सत्याग्रह करण्यासाठी गेला. यासाठी पुढार्यांची संमती घेतली नव्हती. त्यांना हे माहीतही नव्हते.मिरवणुकीसोबत असणार्या काही पोलिसांनी ही बातमी वरिष्ठांना कळवली. इन्स्पेक्टर नापेट दोन लार्या पोलीस घेऊन तेथे हजर झाला. त्याने नऊ जणांना पकडले.पण जमावावर ताबा मिळविणे अशक्य असल्याचे कळटाच कलेक्टर नाईक आणि डीसपी प्लेफेअर पोलीस घेऊन तेथे आले. कलेक्टरच्या हातातील पिस्तुल पाहून जमाव अधिकच भडकला. पकडलेल्या लोकांना सोडण्याची त्यांनी मागणी केली. झालेल्या दगडफेकीत तीन पोलीस व डीसपी जखमीं झाले. तणाव वाढतच होता. कलेक्टरने गोळीबार सुरु केला. ही बातमी समजताच समाजावर ज्यांचा खूप प्रभाव होता असे श्री.धनशेट्टी जबाबदारीच्या जाणीवेने धावतच तेथे आले. सूत्रे हाती घेऊन तणाव कमी केला. पकडलेल्यांची फक्त नावे घेऊन त्यांना सोडावे अशी विनंती केली. तेवढयात २०-२२ वर्षाचा एक धाडसी तरुण पुढे आला त्याने कलेक्टरपुढे पकडलेल्यांना सोडा अशी जणू आज्ञाच केली. त्याक्षणी एका सार्जटने त्याच्यावर गोळी झाडली. ती छातीत लागली व तो धडकन पडला तो सोलापूर शहरातील पहिला हुतात्मा ठरला त्याचे नाव होते शंकर शिवदारे त्यामुळे जमावात प्रचंड खळबळ माजली. कलेक्टर चांगलाच कोंडीत पकडला गेला. भीतीने तो गलितगात्र झाला. जमावाला हा विजय वाटला तर कलेक्टर अपमानाच्या सुडेच्या भावनेने पेटून उठला. श्री. धनशेट्टी यांनी कालेक्टरला कसेबसे जमावाच्या कोंडीतून सुखरुखपंणे बाहेर पडण्याची वाट करून दिली. कालेक्टरने खुनशीपणाने जाता जाता गोळीबाराची आज्ञा दिली. अनेक जखमी झाले. जनक्षोभ वाढला. श्री. धनशेट्टी यांनी समजूत घालून जमावाला पांगविले व तेथून गेले.

या सर्व घटनांमुळे लोकांचा पोलिसांवरील राग प्रचंड वाढला. पांगवलेल्या जमावातील काही लोक मंगळवार पेठ पोलीस चौलीपाशी आले त्यांना राग व्यक्त करण्याची संधी मिळाली. त्यांनी चौकीतील कागदपत्रे जाळली. दादाजाफर ( हवालदार ) वय ५५ वर्षे याला पेटवून दिले व चांद अल्लाउद्दिन (कॉन्स्टेबल ) वय २२ वर्षे यास जीवे मारले. सुडाने पेटलेल्या जमावाला आपण काय करतो आहोत याचे भानच राहिले नाही. पुढे त्यांनी कोर्टाची कागदपत्रे जाळली आणि कोर्टालाच आग लावली. हे सर्व प्रकरण ३-४ तास चालू होते. धास्तावलेल्या कलेक्टर आणि डीसपी यांनी आपल्या कुटुंबियांना परगावी पाठवण्याची तयारी केली. या सुडातून पोलिसांनी ज्या भागात शांतता होती तेथे दुपारी दीड वाजेपासून सायंकाळी साडेसात पर्यंत सुमारे ६ तास रस्तोरस्ती अंधाधुंद गोळीबार केला. यात सुमारे १०३ गोळ्या झाडल्या असंख्य मारले गेले. ही बातमी मुंबईला कळली आणि यातुनच मार्शल कायदा पुकारण्याची पार्श्वभूमी तयार झाली.

स्वतंत्र सोलापूर[संपादन]

कलेक्टर नाईट रजेवर गेले. दि .९,१०,११ व १२ मे रोजी शहरात ब्रिटीश शाषनच नव्हते. काँग्रेस कमिटीने पुढाकार घेऊन शांतता प्रस्थापित केली. व्यवहार सुरळीत चालू केले. इथल्या वाहतुकीच नियंत्रण हे काँग्रेसचे स्वयंसेवक करत होते. अशा रीतीने सलग चार दिवस स्वातंत्र उपभोगणारे सोलापूर हे हिंदुस्थानातील पहिले शहर ठरले.

मार्शल कायद्याची घोषणा[संपादन]

सोलापूरातील हा सर्व वृत्तांत मुंबई सरकारला कळविण्यात आला. परंतु नाईट आणि हॉटसन यांनी शिजवलेल्या कटानुसार दि.१२ मे रोजी रात्री ०८:३० वाजता सोलापूर शहरात मार्शल कायदा पुकारण्यात आला. त्यामुळे सोलापूरचे नाव लंडनपर्यंत दुमदुमले.

मार्शल कायद्याचे स्वरूप/कलमे[संपादन]

व्हाईसरोय लॉर्ड आयर्विन यांनी सोलापूरातील लष्करी कायद्यासाठी १५ मे ला अध्यादेश प्रसिद्ध केला. त्यातील कलमे पुढीलप्रमाणे होती-

  1. या कायद्याला सोलापूर मार्शल कायदा असे म्हणावे.
  2. सोलापूर शहराच्या मुन्सिपल हद्दीत हा कायदा लागू केला जाईल.
  3. मुख्य सेनापतीने योग्य लष्करी अधिकार्याकडे या कायद्याच्या अंमलबजावणीचे काम द्यावे.
  4. या लष्करी अधिकार्यास शांतता रक्षणासाठी जरूर ते कायदे-कानून करण्याचा अधिकार राहील.
  5. लष्करी अधिकार्याने केलेले कायदे-कानून नागरिकांना कळावेत अशा रीतीने प्रसिद्ध करावेत.[ संदर्भ हवा ]
  6. * धरपकड :-    कर्नल पेजने लष्करी कायद्याखाली धरपकडीचे सत्र सुरु केले. त्याने मंगळवार पोलीस चौकी जाळणे, तेथील पोलिसाना ठार मारणे व जमावाला भडकावणे असे खोटे आरोप ठेवून दि. १३ मे रोजी देशभक्त जगन्नाथ शिंदे व श्री. किसन सारडा याना सायंकाळी ०६ वाजता अटक केली. दि. १४ मे रोजी सकाळी श्री. मलप्पा धनशेट्टी आणि कुर्बान हुसेन यांना अटक केली.
  7. * फाशीची शिक्षा :-    मार्शल कायद्याअंतर्गत पकडलेल्या सर्वांवर खटले भरण्यात आले, शिक्षा दिल्या. धनशेट्टी, हुसेन, सारडा, शिंदे यांना खोट्या आरोपाखाली आणि खोट्या साक्षीवर आधारित फाशीची शिक्षा सुनावण्यात आली.               

संदर्भ[संपादन]

.डॉ.श्रीकांत येळेगावकर,सोलापूरच्या स्वातंत्र्य लढ्यातील दीपस्तंभ