शेरलॉक होम्स

विकिपीडिया, मुक्‍त ज्ञानकोशातून
शेरलॉक होम्स
Sherlock Holmes Portrait Paget.jpg
सिडनी पेजेट याने रेखलेले इ.स. १९०४ मधील कल्पनाचित्र
कार्यकाल इ.स. १८७७ - इ.स. १९१४
लेखक सर आर्थर कॉनन डॉयल
माहिती
सहकारी डॉ. वॉटसन
व्यवसाय सत्यान्वेषी
कुटुंब मायक्रॉफ्ट होम्स (मोठा भाऊ)
राष्ट्रीयत्व इंग्लंड
तळटिपा


शेरलॉक होम्स (इंग्लिश: Sherlock Holmes) हे स्कॉटिश लेखक सर आर्थर कॉनन डॉय्ल यांनी लिहिलेल्या कथानकांमधील नायकाचे नाव आहे. होम्स हे पेशाने सत्यान्वेशी (डिटेक्टिव) आहेत. अविश्वसनीय चातुर्य असलेले होम्स इंग्लंड मधील लंडन शहरात राहात असून, आधुनिक विज्ञान, रसायन शास्त्र आणि सूक्ष्म निरीक्षणाचे वापर करून अनेक अवघड गुन्हे सोडवत असे.

१८८७ मध्ये पहिल्यांदा प्रसिद्ध झालेल्या होम्सवर डॉय्ल यांनी ४ कादंबऱ्या आणि ५६ लघु-कथा लिहिल्या. “अ स्टडी इन स्कार्लेट” ही पहिली कादंबरी “बीटनझ् ख्रिसमस ॲन्यूअल” नावाच्या मासिकेत १८८७ या वर्षी प्रकाशित झाली. दुसरी कादंबरी “द साइन ऑफ फोर”, “लिप्पिनकॉटस् मंथली मॅगझीन” या मासिकेत १८९० वर्षी प्रकाशित झाली. या नंतर १८९१ ते १९२७ पर्यंत “द स्ट्रँड मॅगझीन” मध्ये प्रकाशित झालेल्या लघुकथांमधून होम्स या पात्राला वाचकांकडून प्रचंड प्रतिसाद मिळाला. कथानकातील घटना १८८० ते १९१४ या कालावधीत घडतात.

डॉय्ल यांनी या कथा, होम्स चे साथी आणि चरित्रकार डॉक्टर जॉन एच. वॉटसन हे कथन करीत असल्याच्या पद्धतीने लिहिल्या आहेत. एकूण कथांपैकी केवळ ४ वगळून बाकी सर्व कथांचे कथन डॉ. वॉटसन करतात. राहिलेल्या ४ पैकी २ चे कथन स्वतः होम्स करतात आणि २ कथा तृतिय-पुरुष दृष्टीकोणातून सांगितल्या गेल्या आहेत.

पात्ररचनेमागील प्रेरणा[संपादन]

शेरलॉक होम्स या काल्पनिक पात्रामागील प्रेरणास्रोत हे डॉ. जोसेफ बेल हे आहेत, असे डॉयल यांनी नमूद केले आहे. डॉयलनी जोसेफ बेल यांच्या एडिनबर्ग रॉयल इन्फर्मरी या संस्थेत कारकुनी केली होती. होम्सप्रमाणेच बेलसुद्धा अगदी साध्या निरीक्षणांतून मोठ्या निष्कर्षांपर्यंत पोहोचत असे. रॉयल कॉलेज ऑफ सर्जन्स या महाविद्यालयामधील व्याख्याते सर हेन्‍री लिटलजॉन हेसुद्धा होम्सच्या पात्रामागची प्रेरणा आहेत असे मानले जाते. त्यांनी पोलिस सर्जन आणि वैद्यकीय अधिकारी म्हणून काम केले होते. या दोघांमुळे सर आर्थर यांना वैद्यकीय तपासणी आणि सूक्ष्म निरीक्षणे यांची जोड गुन्हे अन्वेषणासाठी मदतरूप झाली.

वैयक्तिक जीवन[संपादन]

Magazine cover featuring A Study in Scarlet, with drawing of a man lighting a lamp
१८८७ मध्ये प्रथम प्रकाशित कथा 'अ स्टडी इन स्कार्लेट'

डॉय्ल यांनी लिहिलेल्या कथांमध्ये होम्सच्या वैयक्तिक जीवनाबद्दल अथवा नातेवाइकांबद्दल खूप कमी माहिती मिळते. “हिस लास्ट बाव” या कथेतील घटना १९१४ मध्ये घडतात. या कथेमध्ये होम्सचे वय ६० वर्ष असल्याचे सांगितले गेले आहे. यावरून होम्सचे जन्म १८५४ मध्ये झाल्याचा अंदाज लावला जाऊ शकतो. “द न्यू ॲन्नोटेटेड शेरलॉक होम्स” चे लेखक लेस्ली क्लीन्गर यांनी होम्सची जन्मतारीख ६ जानेवारी असल्याचे म्हटले आहे.

सूक्ष्म निरीक्षण आणि त्यातून करण्याचे निष्कर्षण यांचा अभ्यास पदवीपूर्व काळातच चालू केल्याचे होम्स सांगतात. त्यांनी केलेली सुरुवातीची अन्वेषणे ही त्यांच्याच बरोबर शिकत असलेल्या सोबती विद्यार्थ्यांसाठी केल्याचे कळते. होम्स सुट्टी साठी एका मित्राच्या घरी गेलेले असताना, त्या मित्राचे वडील होम्स चे निरीक्षणकौशल्य पाहून त्यांना सत्यान्वेशी होण्याचा सल्ला देतात. शिक्षण पूर्ण केल्यावर ६ वर्षे होम्स गुन्हे अन्वेषणाचे काम करतात. त्यानंतर आर्थिक तणावामुळे घरभाडे एकट्याने परवडत नसल्यामुळे ते डॉ. वॉटसन यांच्याबरोबर २२१ बी. बेकर स्ट्रीट या पत्त्यावर घर भाड्याने घेतात व तेथे राहू लागतात. एकत्र राहू लागल्यानंतर डॉ. वॉटसन होम्सच्या अन्वेषणकार्यामध्ये रुची घेऊ लागतात आणि त्यांच्या कामात त्यांची मदत करू लागतात. २२१ बी. बेकर स्ट्रीट येथील त्यांचे वास्तव्य १८८१ पासून झाल्याचे कळते. २२१बी हे घर “बेकर स्ट्रीट” या रस्त्याच्या सुरुवातीलाच असून, घराच्या पहिल्या मजल्यावर होम्सची खोली असत व दुसऱ्या मजल्यावर डॉ. वॉटसन यांची खोली असत.

डॉ. वॉटसनशी ओळख व्हायच्या अगोदर होम्स एकटेच काम करत असत. क्वचित प्रसंगी ते काही विशिष्ट माहिती मिळवण्यासाठी रस्त्यावरील उनाड मुलांची मदत घेत असत. या उनाड मुलांच्या टोळीला “द बेकर स्ट्रीट इर्रेग्युलर्स” असे नाव त्यांनी ठेवले होते. “द बेकर स्ट्रीट इर्रेग्युलर्स”चा उल्लेख ३ कथांमध्ये होतो: “अ स्टडी इन स्कार्लेट”, “द साइन ऑफ फोर” आणि “द ॲडवेन्चर ऑफ द क्रूकेड मॅन”

होम्सच्या पालकांचा उल्लेख कुठल्याही कथेत नाही, मात्र त्यांचे पूर्वज धनिक जमीनदार असल्याचे स्वतः होम्स एका प्रसंगी सांगतात. “द ॲडवेन्चर ऑफ द ग्रीक इंटरप्रीटर” या कथेमध्ये ते हॉरेस वेर्ने नावाच्या आपल्या फ्रेंच काकांचा उल्लेख करतात. ७ वर्षांनी मोठे असलेले होम्सचे वडील बंधू मायक्रॉफ्ट होम्स यांची ३ कथानाकांमध्ये महत्वाची भूमिका असून एका कथे मध्ये त्यांचा नुसता उल्लेख आहे. मायक्रॉफ्ट होम्स हे ब्रिटीश सरकारमध्ये एका महत्वाच्या पदावर होते. अनेक सरकारी विभागांसंदर्भातील बरीच महत्वाची माहिती लक्षात ठेवून ती योग्य ठिकाणी आणि प्रसंगी वापरण्याचे कौशल्य त्यांच्याकडे होते. सूक्ष्म निरीक्षण आणि निष्कर्षण यांची कला त्यांच्यापेक्षाही त्यांच्या बंधूंमध्ये कित्येक पटीने अधिक असल्याचे होम्स डॉ. वॉटसन यांना सांगतात. पण स्वभावानी आळशी असल्यामुळे थोरले होम्स आपला बराचसा वेळ त्यांनी व त्यांच्या सहकाऱ्यांनी प्रस्थापित केलेल्या एका क्लब - “डायोजीनिझ क्लब” - मध्ये घालवत असत.

डॉ. वॉटसन बरोबरचा काळ[संपादन]

Holmes (in deerstalker hat) talking to Watson (in a bowler hat) in a railway compartment
सिडनी पॅजेट यांनी बनवलेल्या ‘सिल्वर ब्लेझ’ या कथेमधील एका चित्रात होम्स आणि डॉ. वॉटसन

होम्सनी एकूण २३ वर्षे अन्वेषणाचे कार्य केले ज्यापैकी १७ वर्षे डॉ. वॉटसन त्यांच्या सोबत होते. १८८७ मध्ये डॉ. वॉटसनच्या लग्नाआधी आणि पुढे त्यांचा पत्नीच्या निधनानंतर ते एकत्र राहत होते. २२१-बी बेकर स्ट्रीट येथील त्यांच्या घराच्या मालकिणीचे नाव मिसेस हडसन होते. त्याच त्यांची घरगुती कामे व घराची देखरेखही करत.

बऱ्याचशा कथा डॉ. वॉटसन अन्वेषणाचा सारांश करत असल्याच्या पद्धतीने लिहिल्यागेल्या आहेत. होम्स अनेकदा डॉ. वॉटसनच्या सारांशिक लिखाणाची तीव्र टीका करत. त्यांचे म्हणणे असे की डॉ. वॉटसन सारांश लिहितांना मूळ अन्वेषणापेक्षा संबंधित लोकांची मनस्थिती आणि भावनांवर आणि घटनांच्या रंगीत चित्रणावर जास्त भर देत. त्यामुळे त्या सारांशाचे मुख्य बिंदू निष्कर्षणविज्ञान नसून व्यक्तिरेखा आणि घटना वर्णन असे.

लिखाणासंदर्भात दुमत असूनही त्यांच्यातील मैत्री घनिष्ट होती. एका प्रसंगी डॉ. वॉटसन यांना बंदुकाची गोळी लागते. अखेरीस जखम सौम्यच असल्याचे कळते पण आपल्याला गोळी लागल्यामुळे झालेली होम्स ची तडफड पाहून डॉ. वॉटसनचे मन भरून येते. होम्सची भावनाशून्य स्वभावाची सवय असलेल्या डॉ. वॉटसनना त्यांची अशी प्रतिक्रिया पाहून सुखद धक्का बसतो.

द ग्रेट हायॅटस – होम्सच्या जीवनातील अदृश्य खंड[संपादन]

Holmes and Moriarty wrestling at the end of a narrow path, with Holmes's hat falling into a waterfall
रायखेनबाख फॉल्स जवळ झालेली होम्स आणि मॉरियार्टी यांच्यात झटापट. चित्रकार: सिडनी पॅजेट

१० वर्षे होम्सच्या कथा रेखाटल्यानंतर, आपल्या इतिहासविषयक लिखाणावर लक्ष केंद्रित करण्याच्या हेतूने डॉय्ल यांनी १८९३ मध्ये प्रकाशित कथा “द फायनल प्रॉब्लम” मध्ये होम्सच्या पात्राचा अंत केला. या कथेतील घटना १८९१ च्या वर्षात घडतात. “रायखेनबाख फॉल्स” येथे प्रोफेसर मॉरियार्टी बरोबरच्या सामन्यात पाय घसरून दरीत पडल्यामुळे होम्स आणि मॉरियार्टी दोघांचा मृत्यू होतो. होम्सच्या चाहत्यांना त्यांच्या मृत्यूचा स्वीकार नाही झाला आणि ते डॉय्लकडे होम्सच्या कथा पुन्हा लिहिण्यास सुरु करण्याचा आग्रह करत राहिले. ८ वर्षे या आग्रहाचा प्रतिकार केल्यानंतर १९०१ मध्ये त्यांनी “द हाउंड ऑफ बॅस्करविल” ही कादंबरी प्रकाशित केली. या कादंबरीतील घटना होम्सच्या मृत्यूपूर्व काळात घडतात. १९०३ मध्ये प्रकाशित (आणि १८९४ मध्ये घटीत) कथा “द ॲडवेन्चर ऑफ द एमटी हाउझ” मध्ये डॉय्ल यांनी होम्सला अखेर पुनः जीवित केलं. मानसिक संघर्षानंतर होम्सच्या मृत्यूचा स्वीकार केलेल्या डॉ. वॉटसनला होम्सला जिवंत बघून धक्का बसतो. आपल्या शत्रूंना चुकवण्यासाठी मरण्याचा ढोंग केल्याचं होम्स डॉ. वॉटसनला सांगतात. होम्सवर आधारित कथांचा दुसरा पर्व या कथेनी सुरु होतो. दुसरा आणि शेवटचा हा पर्व १९२७ पर्यंत चालला.

पहिल्या आणि दुसऱ्या पर्वांमधील काळ (१८९१ ते १८९४) – म्हणजेच “द फायनल प्रॉब्लम” मधील त्यांच्या मृत्यू पासून “द ॲडवेन्चर ऑफ द एमटी हाउझ” मधील त्यांच्या परतीपर्यंतच्या काळाला होम्सच्या चाहत्यांनी “द ग्रेट हायॅटस” – म्हणजेच होम्सच्या अदृश्यतेचा काळ - असे नाव दिले आहे. “द ग्रेट हायॅटस” या वाक्प्रचारचा सर्वात पहिला वापर एडगर स्मिथ यांनी जुलै १९४६ मध्ये प्रकाशित त्यांचा लेख “शेरलॉक होम्स ॲन्ड द ग्रेट हायॅटस” यात केला. हा लेख “बेकर स्ट्रीट जर्नल” या मालिकेत प्रकाशित झाला होता. १९०८ मध्ये प्रकाशित कथा “द ॲडवेन्चर ऑफ वीस्टीरिया लॉज” मधील घटना १८९२ या वर्षी घडल्याचे वर्णन डॉय्ल यांनी चुकुन केल्याचे आढळते.

निवृत्ती[संपादन]

“हिझ लास्ट बाव” कथेमध्ये होम्स आपल्या कामातून निवृत्ती घेऊन “सस्सेक्स डाउनस” भागात राहण्यास गेल्याचे कळते. तिथे त्यांनी मधमाश्या पाळण्याचे काम हाती घेतल्याचेही कळते. या विषयावर ते एक पुस्तकही प्रकाशित करतात. या कथेमध्ये होम्स आणि डॉ. वॉटसन काही काळासाठी आपल्या निवृत्त जीवनाचा त्याग करून, पहिल्या विश्व युद्धात हाथभार देण्यास काही अन्वेषणे करतात. “हिझ लास्ट बाव” व्यतिरिक्त “द ॲडवेन्चर ऑफ द लायन्स मेन” ही एकच कथा होम्सच्या निवृत्ती पश्चात घडते. होम्सच्या मृत्यू बद्दल कुठलीच माहिती आढळत नाही.

व्यक्तिमत्व व सवयी[संपादन]

Man answering the door to a bowler-hatted man in a raincoat
"द ॲडवेन्चर ऑफ द गोल्डन पिन्स-नेज" मधल्या एका दृश्याचे चित्र. चित्रकार: सिडनी पॅजेट"

होम्स स्वभावाने काहीसे विक्षिप्त आणि चमत्कारिक असून त्यांना स्वच्छता आणि नीटनेटकेपणाची फारशी काळजी नसे. एखाद्या अन्वेषणात तल्लीन झाल्यावर अन्न ग्रहण करण्याचीही त्यांना गरज भासत नसे. खाल्लेल्या अन्नाला पचवण्यामध्ये शारीरिक उर्जा वाया जाते असे त्यांचे मत असे. होम्सना सिगारेट, सिगार आणि चिलीम (pipe) ओढण्याची सवय होती. डॉ. वॉटसन त्यांच्या या व्यसनाची विशिष्ट निंदा करत नसले तरी या वस्तूंमुळे खोलीत निर्माण होणाऱ्या विषारी वातावरणाची निंदा मात्र नेहमी करत.

एखाद्या निष्पाप व्यक्तीला वाचवण्यासाठी आणि गुन्हेगाराचा गुन्हा सिद्ध करून त्याला शिक्षा मिळवून देण्यासाठी होम्स कित्येकदा पुरावे लपवणे, वस्तुस्थितीत फेरबदल, घरफोडी अशे कृत्य करत. हे कृत्य नैतिक पातळीवर न्याय्य असल्यामुळे डॉ. वॉटसनची त्यांना नुसती संमतीच नसून त्यात त्यांचा सहभागही असे. पण कधी कधी गुन्हे सिद्ध करण्याच्या प्रक्रियेत होम्स निरपराधी व्यक्तींची हाताळणी करत. अंतिम ध्येय कितीही नैतिक असले तरी निरपराधी लोकांना त्रास देऊन ते साधणे हे डॉ. वॉटसनना कधीच पटत नसे. ‘द ॲडवेन्चर ऑफ चार्ल्स ऑगस्टस मिल्वर्टन’ या कथेमध्ये चार्ल्स ऑगस्टस मिल्वर्टन नामक गुन्हेगाराविरुद्ध पुरावे शोधात असताना, होम्स त्याच्याच घरातील एक मोलकरीणीची मदत मिळवण्यासाठी तिला लग्नाचं खोटं वाचन देतात. नंतर होम्सने असे केल्याचे कळाल्यावर डॉ. वॉटसन त्यांची टीका करतात.

अनेक प्रसंगी होम्सवर ब्रिटीश सरकारच्या वतीने राष्ट्रीय पातळीवर महत्वाच्या आणि गुप्त विषयांचे अन्वेषण करण्याची जबाबदारी पडत असे.

निरीक्षणकौशल्याने पुलिस अधिकाऱ्यांना भारावून टाकण्यात होम्सना आनंद मिळत असे. आपल्या निरीक्षणकौशल्यावर त्यांना खूप आत्मविश्वास असे. पण इतके कौशल्य असूनही त्यांनी कधीच प्रसिद्धीची इच्छा दर्षवली नाही. आपल्या कामाचं नावलौकिक ते नेहमीच पोलिसांना घेऊ देत असत. ब्रिटीश सरकारतर्फे बहाल केलेले सरदारपदही (knighthood) ते नाकारतात. लंडन शहराबाहेरील पुलिस देखील, योगायोगाने होम्स जवळ-पास असल्यास त्यांची मदत घेत. डॉ. वॉटसन यांनी प्रकाशित केलेल्या लेखांमधून होम्सना खरी प्रसिद्धी मिळते. या प्रसिद्धीमुळे कित्येक गरजू लोक आपल्या समस्येच्या समाधानासाठी होम्सकडे येत. लोकांना होम्सवर पोलिसांपेक्षा जास्त विश्वास असल्याचे कळते. हा विश्वास होम्सच्या प्रसिद्धी बरोबर वाढत गेलेला दिसतो. लंडनचे पंतप्रधान आणि बोहीमियाचे राजा देखील २२१-बी येथील होम्सच्या निवासस्थानात, काही राष्ट्रस्तरीय व संवेदनशील समस्यांबाबत त्यांची भेट घेऊन त्यांची मदत मागतात.

Young man in a suit, looking left
सिडनी पॅजेट, यांनी 'द स्ट्रँड मॅगझीन' मधल्या कथांसाठीसाठी बनवलेल्या चित्रांमुळे होम्स व डॉ. वॉटसन यांना चेहरा मिळाला.

प्रसिद्धीची इच्छा नसली तरी होम्सना आपल्या कौशल्यांची स्तुती केलेली फार आवडत असे. प्रशंसेला ते नेहमीच सकारात्मक प्रतिसाद देत. एरवी अनाग्रही आणि भावनाशून्य असलेले होम्स एखाद्या अन्वेषणात गुंतले की सजीव आणि उत्तेजित होत. गुन्हेगाराला उघडकीस आणण्यास होम्स अनेकदा आपल्या नाटकीय प्रतिभेचा वापर करत. डॉ. वॉटसन किंवा पुलिस अधिकाऱ्यांना भारावून टाकण्यासाठीच ते असे करत.

डॉ. वॉटसनव्यतिरिक्त इतर कोणाच्याही मैत्री अथवा संगतीला ते प्रोत्साहन देत नसत. डॉ. वॉटसनचे एक मित्र एकदा त्यांना व होम्सना सुट्टीसाठी त्यांच्या घरी येण्याचे आमंत्रण देतात. डॉ. वॉटसनचे मित्र अविवाहित असून त्या घरात त्यांना पूर्ण मोकळीक मिळणार, केवळ या कारणाने तिथे जायला होम्स तयार होतात. ‘द ॲडवेन्चर ऑफ द ग्लोरिया स्कॉट’ या कथेमध्ये होम्स डॉ. वॉटसना सांगतात की त्यांच्या २ वर्षांच्या विद्यालयीन काळातही त्यांचा एकच मित्र होता, ज्याचे नाव व्हिक्टर ट्रेवर होते. ते करत असलेला अभ्यास हा त्यांच्या सोबती विद्यार्थ्यांपेक्षा वेगळा असल्यामुळे त्यांच्यात मिसळण्याची किंवा त्यांच्या सोबतीत वेळ घालवण्याची त्यांना संधीही मिळत नसे आणि त्याची गरजही त्यांना भासत नसे.

संगीत, विशेषतः व्हायोलीन वादनाची होम्सना आवड होती. ते स्वतः उत्तम व्हायोलीन वादन करत. ‘द ॲडवेन्चर ऑफ द रेड हेडेड लीग’ मध्ये होम्स आपल्या अन्वेषणकार्याला काही काळ विराम देऊन विश्रांती करता पाब्लो डे सारासाटे यांचे व्हायोलीन वादन ऐकायला जातात. गायनात (विशेषतः वाग्नर यांच्या संगीतात) असलेली त्यांची रूची ‘द ॲडवेन्चर ऑफ द रेड सर्कल’ मध्ये दिसून येते.

मादक पदार्थांचा (drugs) वापर[संपादन]

Holmes in a blue bathrobe, reclining against a pillow and smoking his pipe
'द ॲडवेन्चर ऑफ द मॅन विथ द ट्विस्टेड लिप' मधील होम्सचे पोर्ट्रेट. चित्रकार: सिडनी पॅजेट. वर्ष: १८९१

जटिल समस्या सोडवण्यामध्ये त्यांचे मन सक्रीय आणि क्रियाशील राहात, पण अन्वेषणकार्यात गुंतलेले नसले तर होम्सची कंटाळवाणी अवस्था होत. अशावेळी ते कोकेनचे ७% सौम्य मिश्रणाचे इंजेक्शन घेत. क्वचित प्रसंगी होम्स मॉरफीनचाही वापर करत, पण कोकेनइतके त्यांना मॉरफीन आवडत नसे. १९-साव्या शतकातील इंग्लंडमध्ये या दोन्ही पदार्थांचा वापर कायदेशीर होता. एका डॉक्टरच्या नात्याने व त्यांचा एकुलता एक मित्र या नात्याने डॉ. वॉटसन होम्सच्या या व्यसनाचे तीव्र विरोध करत. होम्सच्या मानसिक आरोग्यावर आणि बुद्धिमत्तेवर पडण्याऱ्या दुष्परिणामांची त्यांना सतत काळजी लागून असे.

तंबाखू, सिगारेट, सिगार यांचे सेवन होम्स व डॉ. वॉटसन दोघे करत. होम्स केवळ राखेवरून सिगारेट किंवा सिगारची छाप ओळखत. ‘द ॲडवेन्चर ऑफ द मिसिंग थ्री-क्वॉर्टर’ मध्ये होम्सची ड्रग्सच्या वियोगाची सहनशक्ती वाढलेली दिसते. असे असले तरी होम्सचे व्यसन कायमची निघून गेले नसून केवळ निद्रावस्थेत असल्याची चिंता डॉ. वॉटसन याच कथेत प्रकट करतात.

मराठी भाषांतरे[संपादन]

सर आर्थर कॉनन डॉयल यांच्या ’शेरलॉक होम्स’ कथांची मराठीत अनेक भाषांतरे झाली आहेत. त्यांतली काही अशी : -

  • द व्हॅली ऑफ फियर (कादंबरी)(प्रवीण जोशी)
  • शाबास, शेरलॉक होम्स! (भा.रा. भागवत) - पाच पुस्तके
  • शेरलॉक होम्सच्या चातुर्यकथा भाग १ ते ६ (भालबा केळकर)
  • शेरलॉक होम्स : द हाउंड ऑफ दि बास्करव्हिल्स (प्रवीण जोशी)
  • शेरलॉक होम्सच्या अखेरच्या काही साहसी कथा (जैको प्रकाशन)
  • शेरलॉक होम्सच्या कर्तृत्व कथा (जैको प्रकाशन)
  • शेरलॉक होम्सच्या पाच कथा (बिंबा केळकर) - द ॲडव्हेंचर्स ऑफ चार्ल्स ऑगस्टस मिलव्हर्टन (घात आणि आघात), द डिसॲपिरन्स ऑफ लेडी फ्रॅन्सिस कार फॅक्स (काळ आला होता पण...), द ॲडव्हेंचर ऑफ ब्लॅक पीटर (काळोखातले कृष्णकृत्य), द ॲडव्हेंचर्स ऑफ द डेव्हिल्स फूट (सैतानी पाऊल) आणि द प्रॉब्लेम ॲन्ड थॉर ब्रिज (थॉर ब्रिजवरचे सूडनाटय)
  • शेरलॉक होम्सच्या साहसी कथा (जैको प्रकाशन)
  • शेरलॉक होम्सः सुपर-ब्रेन (पंढरीनाथ सावंत)-"द हाउंड ऑफ दि बास्करव्हिल्स" व "द व्हॅली ऑफ फिअर" या दोन कादंबऱ्या
  • संपूर्ण शेरलॉक होम्स (गजानन क्षीरसागर)
  • साहसी शेरलॉक होम्स (संजय कप्तान)


Wiki letter w.svg
कृपया स्वत:च्या शब्दात परिच्छेद लेखन करून या लेखाचा / विभागाचा विस्तार करण्यास मदत करा.
अधिक माहितीसाठी या लेखाचे चर्चा पान, विस्तार कसा करावा? किंवा इतर विस्तार विनंत्या पाहा.