बुर्ज अल अरब

विकिपीडिया, मुक्‍त ज्ञानकोशातून

बुर्ज अल अरब (अरबी: برج العرب) हे दुबईमधील एक आलिशान हॉटेल आहे. ३२१ मीटर (१,०५० फूट) उंच असलेली बुर्ज अल अरब ही संपूर्णपणे हॉटेल म्हणुन वापरली जाणारी जगातील दुसरी सर्वात उंच इमारत आहे. बुर्ज अल अरब दुबईच्या जुमेराह बीचपासुन २८० मीटर अंतरावर एका कृत्रिम बेटावर बांधण्यात आले आहे व त्याचा आकार साधारणपणे जहाजाच्या शिडासारखा आहे.

बुर्ज अल अरबचे बांधकाम १९९४ साली सुरु झाले व २००० साली ह्या हॉटेलचे उद्घाटन करण्यात आले. बांधकाम पुर्ण करण्यासाठी सुमारे ६५ कोटी डॉलर्स इतका खर्च आला. बुर्ज अल अरब हे जगातील सर्वात महागड्या हॉटेलपैकी एक मानले जाते. ह्या हॉटेलमध्ये २०२ खोल्या आहेत.