रामसे बंधू

श्याम रामसे (जन्म : इ.स. १९५२; मृत्यू : १८ सप्टेंबर २०१९) आणि आणि तुलसी रामसे (जन्म : कराची, २९ जुलै १९४४, मृत्यू : मुंबई, १३ डिसेंबर २०१८)हे दोघेही बंधू हिंदी भयपट बनवण्यासाठी प्रसिद्ध होते. फतेहचंद यू. रामसे हे त्यांचे वडील. त्यांची कराची आणि लाहोरमध्ये इलेक्ट्राॅनिक्सची दुकाने होती. हिंदुस्थानच्या फाळणीनंतर ते आपल्या सात मुलांसह मुंबईत आले आणि त्यांनी लॅमिंग्टन रोडवर एक इलेक्ट्राॅनिक्सचे दुकान काढले.

श्याम रामसे यांनी १९७०च्या दशकात हिंदी सिनेसृष्टीत हॉरर सिनेमा आणला. त्यांनी आणि तुलसी रामसे यांनी अंधेरा (१९७५), इन्स्पेक्टर धनुष (१९९१), कोई है (२०१७), तलाशी (१९९६), तहखाना (१९८६), द माॅन्स्टर (१९९४), दरवाजा, दो गज जमीन के नीचे (१९७१), पुराना मंदिर (१९८४), पुरानी हवेली (१९८०), बंद दरवाजा, वीराना, सबूत (१९८०) या सिनेमांचे दिग्दर्शन केले होते. त्यांनी एकूण ३० भयपट निर्माण केले. त्यांच्या 'दो गज जमीन के नीचे' या चित्रपटाच्या निर्मितीला साडेतीन लाख रुपये खर्च आला आणि त्याच्या पहिल्या आठवड्याची कमाई ३५ लाख रुपये होती.

श्याम यांनी त्यांचे बंधू तुलसी रामसे यांच्यासोबतीने भारतीय दूरचित्र वाहिन्यांवर हॉरर शैलीच्या मालिका आणल्या. १९९३ ते २००१ पर्यंत चाललेली झी हॉरर शो ही त्यांनी भारतीय वाहिन्यांवर आणलेली पहिली मालिका ठरली.