मोहन जोशी

मोहन जोशी (जन्म : ४ सप्टेंब, इ.स. १९४५) हे रंगमंचावरील आणि चित्रपटातील एक प्रसिद्ध मराठी अभिनेते आहेत. ते मराठी नाट्य परिषदेचे अध्यक्ष आहेत (इ.स. २०१५)

मोहन जोशींना लहानपणापासूनच नाटकात काम करण्याची आवड होती. त्यामुळे वडिलांनीही नाटकात काम करण्याची परवानगी दिली. नाटकात काम करण्याचा प्रारंभ त्यांनी १९६६ म्हणजे इयत्ता सहावीत असल्यापासून केला. नाटक सुरू असताना ते बी.कॉम. झाले. पदवीधर झाल्यावर पोटापाण्याची सोय व्हावी म्हणून किर्लोस्कर कंपनीत नोकरीला लागले. पण नाटकाच्या दौर्‍यांसाठी सुट्या लागायच्या आणि त्यासाठी प्रत्येकवेळी खोटे बोलणे अपरिहार्य झाले. एक दिवस व्यवस्थापकाजवळ त्यांचे बिंग फुटले आणि त्यांनी नोकरी किंवा नाटक यापैकी एक निवडायला सांगितले. मोहन जोशी यांनी शांतपणे विचार करून दुसर्‍या दिवशी नोकरीचा राजीनामा दिला.

नाटकाने पोट भरेल अशी स्थिती नव्हती त्यामुळे स्वत:चा ट्रक घेऊन मोहन जोशी ड्रायव्हर झाले. आठ वर्षे ड्रायव्हर म्हणून काम केले. पुढे ‘एक डाव भुताचा’ या पहिल्या मराठी चित्रपटात त्यांना खलनायकाची भूमिका मिळाली, आणि शेवटी ते अभिनयक्षेत्रात स्थिरावले.

मोहन जोशी यांची भूमिका असलेली नाटके

• आसू आणि हसू
• कलम ३०२
• गाढवाचं लग्न
• गोड गुलाबी
• गोष्ट जन्मांतरीची
• पुरुष
• मी रेवती देशपांडे
• सुखान्त

मोहन जोशी यांचा अभिनय असलेल्या दूरचित्रवाणी मालिका

• अग्निहोत्र
• एका लग्नाची तिसरी गोष्ट
• एका लग्नाची दुसरी गोष्ट
• गुंडा पुरुष देव
• भैरोबा

मोहन जोशी यांचे चित्रपट

• अग्निदिव्य
• आपली माणसे
• एक गडी बाकी अनाडी
• एक डाव भुताचा
• घराबाहेर
• जिवलगा
• डेबू
• तू तिथे मी
• देऊळ बंद
• नशीबवान
• नॉट ओन्ली मिसेस राऊत
• बलिदान
• बे दुणे साडे चार
• मोकळा श्वास
• यंदा कर्तव्य आहे
• शास्त्र
• सवत माझी लाडकी
• सारेच सज्जन
• हाच सुनबाईचा भाऊ

आत्मचरित्र

• मोहन जोशी यांनी ‘नटखट नट-खट’ या नावाचे आत्मकथनात्मक पुस्तक लिहिले आहे.

पुरस्कार

’नटखट’ या आत्मचरित्राला, पुणे नगर वाचन मंदिराच्या कार्यक्रमात डॉ. वि.भा. देशपांडे यांच्यातर्फे फय्याज यांच्या हस्ते ’इंदिरा भास्कर पुरस्कार’ देण्यात आला. .