शेजारती

हिंदू धर्मात देवाला झोपाविण्याच्या कल्पनेने केलेली आरती म्हणजे शेजारती होय.

भारतातील अनेक मंदिरांमध्ये प्रतिदिनी किवा काही विशिष्ठ काळात शेजारती करण्याची पद्धत आहे.

महाराष्ट्रात अनेक संतमंडळींनी शेजारती रचल्या आहेत. बहुतांशी शेजारत्या ह्या प्राकृत किंवा मराठी भाषेत आहेत.

श्री दत्तात्रेयांची शेजारती

आतां स्वामी सुखे निद्रा करा अवधूता, करा अवधूता ।

चिन्मय सुखधामा जाउनि पहुडा एकांता ॥ धृ. ॥

वैराग्याचा कुंचा घेउनि चौक झाडीला, स्वामी चौक झाडीला ॥

तयावरी सुप्रेमाचा शिडकावा दिधला ॥ आतां. ॥ १ ॥

पायघड्या घातल्या सुंदर नवविधाभक्ती, स्वामी नवविधाभक्ती ।

ज्ञानाच्या समया उजळूनी लावियल्या ज्योती ॥ आतां ॥ २ ॥

आशातृष्णा कल्पनांचा सांडुनि गलबला, स्वामी सांडुनि गलबला ।

दया क्षमा शांती दासी उभ्या सेवेला ॥ आतां. ॥ ३॥

दैत्याचें कपाट लाउनी एकत्र केलें, स्वामी एकत्र केलें ।

दुर्बुद्धीच्या गांठी सोडुनि पडदे सोडीले ॥ आतां. ॥ ४ ॥

भावार्थाचा मंचक ह्रुदयाकाशीं टांगीला, ह्रुदयाकाशी टांगीला ।

मनाची सुमनें जोडुनी केलें शेजेला ॥ आतां. ॥ ५ ॥

अलक्ष्य उन्मनि नाजूक दूशेला, स्वामी नाजुक दूशेला ।

निरंजनी सद्‌गुरू माझा निजी निजेला ॥ आतां. ॥ ६ ॥