केसरबाई केरकर

सुरश्री केसरबाई केरकर (जन्म : १३ जुलै १८९२, मृत्यू : १६ सप्टेंबर, १९७७) या भारतीय (हिंदुस्तानी) शास्त्रीय संगीतातील प्रतिभावंत गायिका होत्या. त्या संगीतातील जयपूर-अत्रौली घराण्याच्या गायिका होत्या. विसाव्या शतकातील उत्तम व अतिशय प्रभावी हिंदुस्तानी शास्त्रीय संगीत गायिकांमध्ये त्यांची गणना केली जाते.

जीवन

गोव्याच्या उत्तर भागातील पोंडा तालुक्यातील केरी नामक खेड्यात गोमंतक मराठा समाजात केसरबाईंचा जन्म झाला. वयाच्या आठव्या वर्षी त्यांनी कोल्हापूर येथे प्रयाण करून आठ महिने उस्ताद अब्दुल करीम खाँ साहेबांकडे संगीताचे धडे घेतले. गोव्याला परत आल्यावर त्यांनी प्रसिद्ध गायक रामकृष्णबुवा वझे (इ. स.१८७१ - १९४५) यांच्याकडे आपले संगीत शिक्षण चालू ठेवले. वयाच्या १६ व्या वर्षी त्यांनी मुंबईत स्थलांतर केले व तिथे अनेक संगीत गुरुंकडून त्या धडे घेत राहिल्या. सरतेशेवटी १९२१ मध्ये त्यांनी जयपूर-अत्रौली घराण्याचे संस्थापक उस्ताद अल्लादिया खान साहेब (इ. स.१८५५ - १९४६) यांचे शिष्यत्व पत्करले.

सांगीतिक कारकीर्द

केसरबाईंच्या गायनाची कीर्ती लवकरच चहूं दिशांना पसरली. त्या राजे - सरदार मंडळींसाठीही नियमितपणे मैफिली करत असत. त्यांनी आपल्या गाण्याची काही ध्वनिमुद्रणेही केली. नोबेल पुरस्कार विजेते रविंद्रनाथ टागोर हे केसरबाईंच्या गायनाचे विलक्षण चाहते होते असे सांगितले जाते. कोलकाता येथील संगीत प्रवीण संगीतानुरागी सज्जन सम्मान समितीने इ. स. १९४८ मध्ये केसरबाईंना सुरश्री ही पदवी बहाल केली.

केसरबाईंच्या जन्मगावी ज्या घरी त्यांचे बालपण गेले तिथे आता सुरश्री केसरबाई केरकर हायस्कुलाची इमारत आहे. त्यांचा जन्म जिथे झाला ते त्यांचे पूर्वीचे घर तिथून थोड्याच अंतरावर आहे. दर वर्षी नोव्हेंबर महिन्यात गोवा येथे सुरश्री केसरबाई केरकर स्मृती संगीत समारोह आयोजित केला जातो, तसेच मुंबई विद्यापीठाच्या विद्यार्थ्याला दरवर्षी त्यांच्या नावे संगीत शिष्यवृत्तीही दिली जाते.

पुरस्कार

पद्मभूषण पुरस्कार, भारत सरकार, इ. स. १९६९.

राज्य गायिका पुरस्कार, महाराष्ट्र राज्य, इ. स. १९६९.