विहार

विहार म्हणजे बौध्द भिक्षूंचे निवासस्थान होय. सर्वसामान्यपणे बौद्ध धर्मीय अनुयायांच्या प्रार्थनास्थळालाही विहार म्हटले जाते. विहारात बौद्ध भिक्खु-भिक्खुणी निवास करतात. पाली भाषेत विहार हा शब्द आराम या अर्थी वापरलेला आहे. गौतम बुध्दाने आपल्या अनुयायांना धर्मप्रसारासाठी चारही दिशांना जाण्याचे आदेश दिले होते. त्यानुसार भिक्षू वर्षभर भटकंती करत व पावसाळ्यात एका ठिकाणी वास्त्व्य करत असत. त्या ठिकाणांना विहार किंवा संघाराम म्हणत असत. बौद्ध मठाला बौद्ध विहार म्हणतात.

बौद्ध विहारांत तथागत बुद्धांची प्रतिमा किंवा मुर्ती असते, बौद्ध अनुयायी भिक्खु व उपासक बुद्धांना वंदन करतात. विहार हे शिक्षणाचे केंद्र असते.

जगभरातील बौद्ध विहारांत बुद्धांसोबत बोधीसत्वाची मुर्ती असते तर भारतातील बौद्ध विहारांत बुद्धांसोबत बोधीसत्व डॉ. बाबासाहेब आंबेडकर यांची प्रतिमा असते कारण भारतातील ९५% बौद्ध हे डॉ. बाबासाहेब आंबेडकरांना गुरू मानणारे नवयानी बौद्ध आहेत.